2Cor 7 | BOJ | STEP | O ijo was bole, iŋgi bole kalil di Qotei a nami iga egwa marej. Agi a na bini iga egeqnu. Deqa iga kumbra jigat kalil gago jejamu ti gago are miligi ti di unub qaji di torei uratekritqom. Osim dena iga Qotei aqa ŋamgalaq di une saiqoji sosim a qa ulaoqnsim gago jejamu ti gago are miligi ti torei Qotei yekritosim aqa segi kumbra boleq di sosim dauryoqnqom.

2 Corinthians 7

1 O ijo was bole, iŋgi bole kalil di Qotei a nami iga egwa marej. Agi a na bini iga egeqnu. Deqa iga kumbra jigat kalil gago jejamu ti gago are miligi ti di unub qaji di torei uratekritqom. Osim dena iga Qotei aqa ŋamgalaq di une saiqoji sosim a qa ulaoqnsim gago jejamu ti gago are miligi ti torei Qotei yekritosim aqa segi kumbra boleq di sosim dauryoqnqom.

Pol a Korin naŋgi qa tulaŋ areboleboleiyej

2 Niŋgi nuŋgo are miligi waqtosib iga qalaqalaigoqniye. Niŋgi iga qa qalie. Iga tamo bei kumbra uge bei yosaioqnem. Iga tamo bei ugeugeiyosaioqnem. Iga tamo bei aqa iŋgi iŋgi gisaŋ na yaiyosaioqnem. 3 E nuŋgo jejamuq di une qametŋgwa osim deqa anjam endi merŋgosai. Agi e maronum, iga niŋgi tulaŋ qalaqalaiŋgeqnum. Deqa iga moiqom kio iga ŋambile sqom kio di uŋgum. Iga gago are miligi waqtosim niŋgi qalaqalaiŋgoqnsim sqom. 4 E qalieonum, niŋgi tamo bole deqa e anjam bei ulitqasai. E anjam kalil boleq na merŋgwai. E niŋgi qa tulaŋ areboleboleibqo. Ijo are miligi niŋgi qa tulaŋ laejunu. Iga gulube koba eqnum di uŋgum, e niŋgi qa are qaloqnsim dena ijo are miligiq di e tulaŋ areboleboleibqo.

5 Bati iga Masedonia sawaq gilsimqa iga aqaratqa keresai. Sawa dia gulube gargekoba iga qa boqnej. Tamo qudei naŋgi iga ti anjam na qotoqnem. Iga prugugetoqnsim ulakobaoqnem. 6 Ariya Qotei a na gaigai tamo uŋgasari are gulubeinjreqnu qaji naŋgo are olo latetnjreqnu. Deqa a na Taitus qariŋyonaqa a iga qa bonaqa iga a unsimqa dena gago are olo laej. 7 Ariya gam dena segi Qotei na gago are latetgosai. Taitus a nami nuŋgo ambleq di sonaqa niŋgi na aqa are lateteb a degsi mergonaq qunamqa gam dena dego Qotei na gago are latetgej. Niŋgi na e olo nubqajqa are koba qaleqnub. Niŋgi nuŋgo une qa are ugeiŋgeqnu. Niŋgi e ombla are qujaitosib sqajqa are koba qaleqnub. Taitus a nuŋgo kumbra deqa e saibej deqa e tulaŋ areboleboleibqo.

8 E qalieonum, anjam e nami neŋgreŋyem qaji di niŋgi sisiyosib dena niŋgi are gulubeiŋgej. Ariya e deqa are ugeibosai. Bole, nami e are ugeibej. Ariya bini sai. E qalieonum, anjam e neŋgreŋyem qaji dena niŋgi are gulubeiŋgonaqa jemaiŋgej. Ariya sokiñalayonaq nuŋgo are gulube di olo koboej. 9 Deqa e bini areboleboleibqo. Niŋgi are gulubeiŋgej e deqa areboleboleibosai. Ariya nuŋgo are gulube ti jemai ti dena niŋgi olo are bulyeb deqa e areboleboleibqo. E qalieem, Qotei a segi na are gulube ti jemai ti di niŋgi eŋgej. Deqa gago anjam neŋgreŋyem qaji dena niŋgi ugeugeiŋgosai. 10 Are gulube ti jemai ti Qotei na tamo uŋgasari naŋgi enjreqnu qaji dena naŋgi are bulyeqnub. Deqa Qotei na naŋgi olo eleŋeqnu. Deqa iga are bulyqajqa kumbra qa are ugeigwasai. Ariya are gulube ti jemai ti mandam tamo naŋgo kumbra na branteqnu qaji dena naŋgi moio qa gam tureqnub. 11 Niŋgi geregere are qaliye. Are gulube Qotei na niŋgi eŋgej qaji dena niŋgi siŋgilatŋgej deqa niŋgi are bulyosib agi kumbra bole bole yeqnub. Are gulube dena Qotei na nuŋgo are tigeltetŋgonaqa niŋgi nuŋgo une gereiyosib tamo qujai une yej qaji di a ŋiriŋteb. Osib niŋgi Qotei ulaiyosib aqa sorgomq di soqneb. Qotei na nuŋgo are tigeltetŋgej deqa niŋgi iga qa are koba qaleqnub. Osib niŋgi tamo qujai une yej qaji di aqa une olo gereiyetqa dego are qaleqnub. Niŋgi segi na nuŋgo une di gereiyqajqa are qaleqnub. Nuŋgo kumbra dena iga qalieonum, bole, niŋgi une saiqoji.

12 O was qu, e nami anjam neŋgreŋyosim niŋgi qa qariŋyem. Niŋgi na tamo une atej qaji aqa une gereiyetqajqa e deqa are qalsim anjam di neŋgreŋyosai. Tamo agi tamo dena une yej qaji a qa dego are qalsim anjam di neŋgreŋyosai. Niŋgi na iga tulaŋ qalaqalaigeqnub nuŋgo kumbra di Qotei a unsim boleq atim niŋgi qalieqajqa deqa e anjam di neŋgreŋyem. 13 Nuŋgo kumbra dena gago are tulaŋ laejunu.

Gago are laejunu deqa iga areboleboleigwo. Ariya niŋgi na Taitus aqa are gulube kobotetosib are boleteteb deqa iga olo tulaŋ areboleboleigwo. 14 Nuŋgo kumbra boledamu deqa e nami Taitus saiyosim nuŋgo ñam soqtem. E ijo anjam deqa jemaibosai. Gago anjam kalil nami iga niŋgi merŋgoqnem qaji di bole. Dego kere bini Taitus a qalieqo, anjam iga niŋgi qa saiyosim minjem qaji di dego bole. 15 Taitus a niŋgi qa bonaqa niŋgi a ulaiyosib a osib aqa anjam dauryoqneb. Nuŋgo kumbra bole di Taitus aqa areqaloq di unu deqa a na niŋgi tulaŋ qalaqalaiŋgeqnu. 16 E niŋgi qa qalieonum, niŋgi kumbra bole yoqnsib sqab. Deqa e niŋgi qa tulaŋ areboleboleibeqnu.